Studentët e Akademisë së Arteve çojnë “Kallashnikov”-in në Durrës

Studentët e Akademisë së Arteve të Bukura në Tiranë kanë udhëtuar drejt Durrësit ku kanë ngjitur në skenën e teatrit “Aleksandër Moisiu” shfaqjen “Kallashnikov”. Pjesa në fjalë i përket shkrimtarit hungarez Georg Gabor dhe është përshtatur për aktualitetin shqiptar nga Jetjona Sinani dhe pedagogu i saj udhëheqës Donard Hasani. Komedia zhvillohet brenda një dhome, në të cilën katër personazhet luajnë me njëri-tjetrin me pushtetin që u jep automatiku kallashnikov që kalon sa nga një dorë në tjetrën. Studentët që kanë aktruar në këtë komedi janë Devis Muka, Florian Agolli, Klodian Hoxha dhe Besmir Bitraku. Ata arritën të krijojnë personazhe dhe situata të veçanta, ku nuk mungoi ngjallja e ndjenjës së humorit te publiku. Mesazhi i komedisë është që të tregojë sesa e rrezikshme mund të bëhet loja me pushtetin, kur ky përdoret për qëllime të ngushta personale. Publiku, gjithashtu i përbërë kryesisht nga spektatori i një moshe relativisht të re, e ka mirëpritur me entuziazëm këtë shfaqje, duke e shoqëruar herë-herë edhe me duartrokitje.

Marre nga Gazeta Albania Online